Хьамсара мехкахой!
Тахан, ардара бетта 30-ча дийнахьа 1992-ча шерарча гуйран хана эттача доккхача хатара юкъе байнараш дагалоацаш, дегашка йоккха гайгайоссаш ди да вайна. 34 шу даьннад из хинна, тархьарага диллача йаьха, дукха хама хувцаденна ха я из, бакъда, цу унзарча хатара юкъе ноаной, бераш, барчча дезалаш, гаргара нах байнарашта цаккха а ца ерзаш лешаш латта чов я из мелла ха мара ца яхарах.
Вайна дика дагадоага цхьаккха бехк боацаш из унзара хатар оттар… Цу деношка де доацаш байнараш тахан а дегашка латт, итташ шерашка шоай нахах фу хиннад ца ховш бахарий гайга, бала мела боккха ба гуш да тахан. Дукхача шерашка шоаш мел оадаьча хамах баьнна шоай ценош дуташ арабовла безача кхаьчар галгай. Вай къаман исторе коарга лар йита хама да из! Галгайче цу хана хетта хьаотташ, ший хаматоадара наькъ та хьалхара га боаккхаш яр, цхьа дезал хинна ваши го де, оагув хьаллаца ураэттарнах.
Дерригача къаман ла ма могга хала денош дар уж! Харавар ший цен наараш хьаеллаш, фусамах беха арабаьннараш чуэцаш, шийга дар декъаш вар. Массане юкъара гайга, хало яр из. Техьенгаратехьенга кхоачаш вайна юкъе хьадена, лорадаь хама да из – ваши го деш, оагув хьаллоацаш хилар.
Къаман вахаре цаккха а дицденна дадаргдоацаш, дега дира чов еш дола тархьар да из. 1992-ча шера эттача туржаа дагадохийт вайна сага вахара мах боарам боацаш болга, хатарах цаккха а дикадар хьадала йиш йоацилга. Тахан вай кхетаду, иштта дола хама цхьаккха тайпара оттийта йиш йоацилга!
Цу доккхача хатара юкъе боацача бехках байнарий цераш вай дегашта цаккха йицлургьяц! Зулам ца даржийтара техьакъахьегар доккхача декхарех долга кхетаду вай тахан. Тайп-тайпара дукха къамаш дахача, харакъам ший адаташ, оамалаш, тархьар, культурайолаш долча Россе вахаре геттара лоархаме да ваши бартаца, машар лорабеш дахар. Къамашта юкъе цхьоаго, машар хиларга хьежжа тоалуш хургда боккхача мехка хама. Россе Президент волча Путин Владимира геттара чоага лораде деза аьнна белгалдаь хамаш да уж!
Къаьстта йист хила лов сона тахан вай къонача техьенга. Вай къаман йоккха гайга таена из хатар шоана баргадайнадац, бакъда, къаман тархьардовзаш, цу деношка эттар мела йоккха чов еш хиннад кхетадеш хила деза шо. Машара хам бовзаргболаш, хатарах мела доккха зулам хьадаржайиш я кхетадергдолаш довза деза из.
Тадоагача шера Галгайчен 35 шу дузаргда. Цу юкъа вай республико ший хама тоадеш, хьаотташ хьабенар атта никъ бац, лайнар, текхар кезига дац. Чоалханеча наькъаца, дукхача халонашта духьала увтташ воашоша алашдаьр лорадар, ваши барт, цхьоаго йолаш дахар, дикаш доаржадар – вай декхар да тахан! Техье, техьений дезал дахо йодача хана беркатеча, кхерам боацача мехка ураоттаргболаш, цар кхоане сийрда хургйолашкъахьега деза вай.
Дийца варгвоацаш хала хиннача цу хатара юкъе байнараш тахан дог дизза гайга латташ дагалоац вай, цар гаргарча нахаца из гайга екъаш, царна мел хала да кхетадеш да вай.
Машар, барт, цхьоаго лораяра техьа низ лулба вайна Дала! Цхьаккха дезала ма гулда кхы цу тайпара хатар, цхьаккха саг ма вусалва вайх ший фусамах, паргатонах веха. Хам баь, мах баь варгвоаца хамаш да уж хара сага вахаре, машара моттиг телха ди ма отталда кхы!
Байнарашта Дала гешт долда, Дала къахетам болба, бийрза моттиг даькъала йойла! Дала иман, сабар лулда вайна массанена! Амин!