Тахан Галгай метта, литературан Ди дездеш да вай!
Вай мехка из Ди 2003-ча шерарча тов бетта 10-ча дийнахьа денз дездеш да. Хаьта укх шера къаьстта терко эшаш Ди да из. Россе Президента Путин Владимира юкъедаьккха Россе къамий меттай Ди да вай Россе юххьанца дездеш.
Галгай метта истори тахка, йоазонцара культуран дакъа цох деш къахьегаш лаьттарий цераш дагалаца отта деза ди да из. Галгай метта никъ баьха хилар. Беканаькъан Тембот, Малсаганаькъан Зоврбик ба цу доккхача гулакха хьалха лаьттараш.
Эггара хьалхара литературни произведенеш хьакхоллаш, орфографеца, терминологеца болх беш лаьттар Беканаькъан Тембот, «Сердало» газет арахецаш лаьттарашта юкъе хилар. Вай йоазув хьакхоллаш, дешара оагонца дувзаденнараш доаржадеш, вай фольклор гулъеш къахьийгар Малсаганаькъан Зоврбика, «Сердалон» хьалхара редактор хилар цох.
Техьаго из болх дахобихьар галгай меттаца шоай кхоллама никъ дахьош хиннача йоазанхоша, байтанчаш. Янданаькъан Джемалдина хьагойтар цун коаргал, баьхий хилар,
Базорканаькъан Идриса исторически дагалоаттама мотт бир цох, Чахкенаькъан Саида из боаржабара техьа бехктокхаме оттавир ше, Осменаькъан Хьамзата, Гаьгенаькъан Гирихана таржамашка, литературни балхашка голла дикка дашердир метта хама.
Вай исторецара лоархаме оагув ба из! Метта хама тоаделар, мотт баьржар тайп-тайпарча ханашка наха цунца хьинаре къахьегарах - книжкаш арахецаш, фольклор даязъеш, дунен, эрсий литература таржамаш деш, байташ, пьесаш хьакхоллаш.
Тахан кердадарашка голла из болх дахо бахьа аьттув ба вай! Таханарча ханага хьежжа дола книжкаш арахецаш, дешара йоазош кхоллаш, илманца, культураца, таьрахьашца дувзаденнарашка голла из боаржабар, цун хама хьаллацар лоархаме да тахан.
Къаман мотт вай массане беркате техьале я! Книжкашка хинна ца еш, керда балхаш цунца хьа мела кхоллача хана бахаш, сийдолаш хургба из.
Галгай метта, литературан Денца мехкахой даькъалабувц аз тахан! Наьна метта хама лорадеш, боаггаш бола хам беш, тахан, кхоанарча вахаре из зовне бекаргболаш къахьега хьинар хилда вай!
